1978 - 1984
Gwin ifanc, a'i flas yn dryloyw, gonest ond effemeral.
Canu led-led Cymru, Llydaw ac Iwerddon gyda'r grwp gwerin 'Cilmeri'  a sgwenu 'Gwin Beaujolais' gyda Robat Arwyn. Yfwch!

Ryan Davies   (Y Flodeugerdd Englynion, 1978)
Marwnad Beiro   (Barn, Mawrth 1978)
Colli Cariad
Mis Gorffennaf   (Y Bedol, Gorffennaf 1981)
Mehefin   (Y Bedol, Mehefin, 1981)
Pam: (Nant Gwrtheyrn)   (Cerddlun, Mehefin, 1982)
Ar Enedigaeth Heledd Haf   (Awst 1983)
Ym Mhriodas Noel a Nia   (Y Bedol, Hydref 1983)
Trefor Davies   (Ar lun o waith Meirion Roberts, Mawrth 1984.)
Nadolig Rhai   (Y Faner, Rhagfyr 21/28, 1984)

"Yn y llaw fach mae'r holl fyd."

Ryan Davies

(Ar y cyd gydag Emyr Lewis, Ymryson y Beirdd,
Eisteddfod Aberteifi, 1976)

Yn fud aeth ei dafodau - ond rhywsut
Arhosodd ei stumiau
Yn y cof; 'does dim nacau
Adnabod ei wynebau.

Marwnad Beiro

Beiro a'i hun a bair ynof
Ei angau e' yw fy nghof.
Yn hysb ei waed er cryn sbel
A diau y bydd dawel
Ei hen gorff tra bo'n gorffwys
O bibo can ar bob cwys.

Heb hwn na dim, heb bin dur
A heb hudol deipiadur;
A'r ddoe - diawcs! Ni roddwyd im
Y banda - rwyf heb undim!
Dyflwydd fy mhensel diflas
Canmlwydd yw'r hen lechen las!

Hwn fu fy nghledd dros fy ngwlad -
Un ddeufin. Rwyf amddifad,
Rwyf unig heb arf heno,
Gwywo wnaf heb ei gan o:
A'i inc chwim, ei waed a chig
Y bol ystwyth o blastig.

Mor frau yw ein dyddiau dwys!
Fy mhrydydd sy 'mharadwys;
A Duw'n creu ei farwnad o -
Marwnad bur, marwnad beiro.

Colli Cariad

Oherwydd i'r hin dorri - a chalon
A chwalwyd yn rhewi:
Mae'r heulwen fu'n meirioli
Eira oer fy oriau i?

Mis Gorffennaf 

Mae mireinder morwyndod - hon ar ben
A'i rhubannau'n datod;
Ynghlwm wrth batwm ein bod
Ildiodd i fwrw'i swildod...

Mis Mehefin

Mae 'nghymar a'i gwen araf - yn dadmer
Yn dyner amdanaf,
Yn hwyl y gusan olaf
Dyru'i throed ar drothwy'r haf.

Ym Mhriodas Noel a Nia Davies

Ar las y mor angorodd, - yn y dwr,
A'i gwallt aur a welodd.
Aeth ar draeth a'i enaid rodd
A hi'n gyfan a gafodd.

Pam

(Cerddlun i godi arian tuag at Fwthyn Y Bedol, Rhuthun
yn Nant Gwrtheyrn)

Rhyw ddieithr wer a ddaeth ar hyd
Storiau byw ffenestri'r byd,

Gan haenu'i gen ar y gweinion gwiw
A chwyro'i lwyd ar bob chwarel liw.

Ond rhag unoliaeth ein dynoliaeth ni
Y bwthyn yw'r hyn a adleisia'n cri

Drwy warchod hen ryfeddod drud
Storiau byw ffenestri'r byd.

A rhodia'r iaith i droed y rhiw
I gadw'r llwyd o'r gwydyr lliw.

Ar Enedigaeth Heledd Haf

Direidi'n croni'n y crud! Ti yw'r wawr
Ar y traeth disyfyd;
Nefoedd i ninnau hefyd
A gwên dy fam - gwyn dy fyd!

Trefor Davies,  Bae Colwyn

(Cyflwynwyd y gerdd iddo ar ddarlun gan yr arlunydd Meirion Roberts)

Dy hun a roddaist unwaith - a rhoddaist
Dros ein rhyddid eilwaith,
Rhoddaist y cyfan ganwaith -
Rhoi oes, rhoi einioes i'r iaith.

Nadolig Rhai

Bataliwn o boteli, - Iesu Grist?
Sigarets a wisgi,
Fideos brwnt, chwydu a sbri
A gwin ... i gofio'r Geni.

Barddas Chwefror 1985

Defnyddio'r gwaith:     Gallwch ddefnyddio'r cerddi i'w hadrodd neu eu canu fel cystadleuaeth eisteddfod, ar radio neu deledu heb ganiatad yr awdur.
Dylid, nodi ffynhonell y cerddi, ond nid y caneuon, fel www.barddoniaeth.com.

Hawlfraint y cerddi a'r safle: (oni nodir yn wahanol): Cyfrifiaduron Sycharth, Mehefin, 1996 - 2008. Cedwir pob hawl.
Caniateir islwytho'r testun i un cyfrifiadur yn unig. Caniateir gwneud un copi caled ar gyfer eich defnydd chi yn unig. Ni chaniateir gwerthu na ffeirio na benthyg unrhyw ran o'r testun na'i drosglwyddo mewn unrhyw fodd i unrhyw berson neu bersonau arall heb ganiatad ysgrifenedig y cyhoeddwr yn gyntaf. Erlynir y diawled diegwyddor sy'n torri'r amodau hyn mewn llys barn.